Ekki aðeins þeir óhóflega skuldsettu!

Í frumvarpinu er sagt:

 "Hugsanlega sé hægt að segja að allir þessir aðilar hefðu átt að fara varlegar í skuldsetningu, notkun erlends lánsfjár og fjárfestingum. Líta verði hins vegar til þess að þessar ákvarðanir voru teknar við aðrar efnahagsaðstæður og aðrar væntingar en nú eru og ávallt sé auðvelt að vera vitur eftir á."

Þetta er ekki spurning um að "allir þessir aðilar" hafi hugsanlega farið óvarlega.  Fjöldi fólks hefur engin lán tekið á undanförnum árum, heldur einfaldlega verið með eldri lán af húsnæði sínu.  Í hruninu gerist svo þrennt:  Þessi "gömlu varkáru" lán rjúka upp eins og önnur með óðaverðbólgunni, almennt verðlag og kostnaður við lífsnauðsynjar hækkar, og á móti standa laun í stað, dragast saman eða jafnvel hverfa.

Fólk í þessari stöðu er að lenda í klemmu, og hafði þó engan veginn tekið þátt í dansinum í aðdraganda hrunsins.  Þessar ávítur félagsmálaráðherra, undir rós, eiga því ekki við nærri því alla.

Frumvarp um skuldir lagt fram

Athugasemdir

[Sigurbjörg Eiríksdóttir, 16.10.2009 kl. 21:20]

Sammála þér Velvakandi..Erfitt að þola svona ávítur undir rós! En nú bíð ég og skoða hvernig dæmið virkar! Og ekki undanskil ég fyrirtækin sem hafa verið að fjármagna starfsemi sína alveg grandalaus. Og næstum á einni nóttu skulda þau 100% meira!!!

[Marinó G. Njálsson, 17.10.2009 kl. 00:06]

Þetta er það sem við hjá Hagsmunasamtökum heimilanna höfum ítrekað bent á.  Þess vegna viljum við að sett verði 4% þak á árlegar verðbætur verðtryggðra lán.  Slíkt nýtist öllum sem eru með verðtryggð lán óháð því hvenær lánin voru tekin.  Það er rangt að horfa bara til þeirra sem keyptu á tilteknum tímapunkti og halda að hinir geti borið tjón sitt óbætt.  Höfum í huga að sá sem tók 8 milljón kr. verðtryggt lán fyrir um 20 árum, hann skuldar, þrátt fyrir skilvísar greiðslur, líklegast um 22 milljónir í dag!